主管全國文化資產保存工課(khang-khèr/khè/khuè)个文化部文化資產局(ki̍k/kio̍k)，現主時个辦公廳是佇公賣局第五酒廠（臺中酒廠舊廠），舊臺中酒廠是八十外年个老酒廠，2002年个時，規个廠區已經夆(hőng)登錄做「歷史建築」，即氣仔，文資局為著卜(berh/beh/bueh)整修酒廠个一棟舊建築來成做kāi-kī个辦公廳，竟然提出計畫，想卜共廠區內个四座酒精槽徙(suá)走，理由是只四座有歷史建築身分个酒精槽『有礙觀瞻』，身為文資保存个主管機關，竟然𤆬頭(tshuā-thâu)來破壞已經立法保護个文化資產，按呢是卜按怎叫咱拙(tsua̋i)戇百姓來保護古蹟，逐个哪著共kāi-kī个祖公仔屎（產）留--落來，規氣派下(phài-hā)分割(hun-kuah)，逐个閣聽好(thìng-hó)領現金轉去開。
文化部（以早是文建會）長期以來佇臺北市北平東路个辦公大樓，就是攏用「稅」--个，文建會誠早就咧推捒(tshui-sak)「閒置空間再利用」个政策，結局逐年煞kāi-kī攏開老百姓个稅金去稅大樓來辦公，毋願去揣一个閒置空間來「再利用」做文建會个辦公廳，究勘(kiù-khàm)怹無愛个理由，定著(tiānn-tio̍h)是古建築的確(tik-khak)真歹使用；頂一站仔「新莊副都心」完工落成--矣！聽講文化部嘛無拍算卜搬入去新莊，因為搬厝是蓋費氣个事志(tāi-tsì)。
茲(tse)就是咱个文化主管機關。