我敲電話轉去鹿港問我迄个做木个老爸，伊講是「二架楹(lī-kè-înn)」、「三架楹」、「四架楹」……，我閣特別問伊第二字个呼音，伊講就是「架仔」个「架」，伊毋捌聽過人講「二kènn/kìnn」，茲符合阮佇研究所傳統建築華語个稱呼『二架檁』。
潘科元老師另外提供「桱(kìnn/kènn)」个語源稽考，事實應當也有伊个語用族群，毋拄「桱(kìnn/kènn)」个語義佇無sâng地頭可能有各樣。《臺日典》：「桱(kìnn/kènn)：垂木(たるき)など數(かぞ)へるに用(もち)ひる言葉(ことば)。挺(ちゃう) 。桁(けた)。」
1.日語个「垂木(たるき)」是參咱臺語个「楹仔」垂直，「垂木(たるき)」釘佇「楹仔」懸頂，臺語共日語个「垂木(たるき)」號做「桷仔(kak-á)」，桷仔差不多半尺闊、一寸厚，就是承接厝瓦个柴枋，有時佇桷仔下面也會漆黃漆、畫柴痕，號做「虎皮花」。
2. 挺(ちゃう) 佇日語字典內底有三个意思：「１ 銃・槍(やり)・鋤(すき)・鍬(くわ)・艪(ろ)・ろうそく・墨・三味線など、細長い物を数えるのに用いる。２ 輿(こし)・駕籠(かご)・人力車など、乗り物を数えるのに用いる。３ 酒・醤油などの樽を数えるのに用いる。」以上不管佗一个意思，計是做「助數詞(量詞)」來使用，也就是《臺日典》第一个解說，咧算「垂木(たるき)」个臺語「量詞」。
3. 桁(けた)：「家などで、柱の上に横に渡して垂木(たるき)を受ける材。梁(はり)と打ち違いになる。」日語个「桁(けた)」會用得共伊看做是臺語个「楹仔」，日語个「梁(はり)」論真是唐人建築个「通(thong)」，所致「梁(はり)」參「桁(けた)」愛「打ち違い(十字交叉)」。
根據以上《臺日典》个解說，我分析「桱(kìnn/kènn)」有三个意思，第一个是桷仔，第二个是咧算桷仔个時个數詞，另外一个意思就是「楹仔」，第三个意思符合下面李乾朗教授實際田野調查个結果。
李乾朗《臺灣古建築圖解事典》：「架 【界 見 格】 桁木一根稱為一架，在樑柱結構中，桁木數目決定了屋架之大小，小者為三架或五架，大者可達十五架、十七架或十九架。台灣有些匠師發音為「界」、「見」或「格」，其意相同。」「界」--字除了文讀「kài」以外，白讀「kè/kuè/kerè」有漳泉差，咱毋知李教授是卜記佗一音？拍算伊是卜記文讀个「kài」；「見」--字應當就是卜記白讀个「kìnn」;「格」--字敢是卜記陰入个「keh」，我臆李教授事實是卜記陰去个「kè」。
教育部《臺灣閩南語常用詞辭典》「楹仔(ênn-á)」个釋義：『廳堂前的直柱，後泛指柱子。』方音差表个記錄：
華語詞目 | 柱子 |
鹿港偏泉腔 | 二架 lǐ-kè, 楹仔 înn-á |
三峽偏泉腔 | 二桱 jī-kìnn, 柱仔 thiāu-á, 楹仔 înn-á |
臺北偏泉腔 | 二桱 lī-kìnn, 柱 thiāu, 楹仔 înn-á |
宜蘭偏漳腔 | 柱仔 thiāu-á, 桱 kènn, 楹仔 ênn-á |
臺南混合腔 | 二桱 jī-kènn, 柱 thiāu, 楹仔 ênn-á |
高雄混合腔 | 柱仔 thiāu-á, 桱 kènn, 楹仔 ênn-á |
金門偏泉腔 | 柱 thiāu |
馬公偏泉腔 | 柱 thiāu |
新竹偏泉腔 | 柱仔 thiāu-á, 楹仔 înn-á |
臺中偏漳腔 | 柱仔 thiāu-á |
以上除去「柱」、「柱仔」个義項以外，大概參我頂頭个分析有對同。毋拄只个「柱」、「柱仔」个義項，參阮傳統建築个理解到吊；翻頭轉來看《常用詞辭典》對「楹仔」个釋義：『廳堂前的直柱，後泛指柱子。』不管是『直柱』抑是『柱子』，凊彩去問一个「做木(tsuè/tsò-ba̍k)」个司傅，我相信無人會共汝講「楹仔」號做「柱(thiāu)」抑是「柱仔(thiāu-á)」！
結論，《出死線》p.126：「2-kèⁿ khah koân tiong-chit」，只字「kèⁿ」个漢字到底是「架」、「格」抑是「桱」？綜合以上个分析，暫且歸納出有地方差，有个所在講「架(kè)」，有个所在講「桱(kènn/kìnn)」。