豐原舊名「葫蘆墩」，地號名是來自平埔族个番社名，因為古早个平埔仔Pazeh族岸裡大社有九个小社，其中一个是「Huluton社」，所致漢譯做「葫蘆墩社」；到日本時代大正九--年(1920)，因為葫蘆墩米真出名，日本人引用神敕「豐葦之原、瑞穗之國」，則共「葫蘆墩」改名做「豐原(とよはら)」。
佇豐原街仔頂有一條張達京所開个「葫蘆墩圳」，灌溉地區包括豐原、潭子(thâm-tsú/tsír)、神岡(sin-kóng)、大雅(tāi-ngé)、北屯(pak-tūn)、西屯(sai-tūn)，也是「葫蘆墩米」上重要个水利設施；「葫蘆墩圳」流過豐原街仔頂个中正路（舊名「本通」），圳溝頂有一座「葫蘆墩橋」，橋東號做「頂街」、橋西號做「下街」。
現主時佇豐原車頭邊--頭个「頂街派出所」，是明治39--年(1906)起造--个，佇昭和10--年(1935)墩仔跤大地動个時不幸全毁，翻轉年(1936)則閣重起，也就是目今所看著个建築，斯當時，「上樑(tsiūnn-niû // tsiōnn-niô)」tshāi佇厝間枝骨个「棟札(むなふだ // むねふだ)」，猶保存甲真完整。
派出所已經佇2002年登錄做「歷史建築」，巡查(sûn-tsa)大人也佇2012年遷去對面新个辦公廳，目前依照活化再利用个精神，由觀光旅遊局參仁社簽約代管。