永建國校司令臺欲列做文化資產？

頂禮拜三早起，我佇阮學校ê會議室咧整理資料，無張無持教務主任講tserâ欲會議，當我開始款物件準備欲徙位ê時，無疑悟攑頭一下看，看見我ê指導教授－林會承先生踏入阮學堂ê會議室，原來亻因欲來會議學校ê一座「文化資產」，後壁相連紲入--來ê委員猶有張崑振教授、周宗賢教授、辛晚教教授，計是我研究所時代四常(sìr-siông)接接(tsih-tsip)ê老前輩。

這是一个民國42年起ê「司令臺」，佇阮永建國校未來新校區ê內底，tsit塊地基是「國家發展研究院（國發院）」ê前身「革命實踐研究院」，1949年國民黨落跑來到臺灣，佇1953年ê時踮草山重新成立革命實踐研究院，而且設立分院佇木柵ê「中興山莊」，也就是未來永建國校ê新校區kap伊ê南爿，南爿佇2005年ê時，已經去予國民黨賣予元利集團，準備欲起新大樓，北爿tsit塊地基是永建國校ê新校區。

 

論真，若uì 文化資產三項上基本ê要素來看，無論是歷史上、技術上、藝術上ê佗一項，tsit座司令臺在我土想，根本就猶無列做文化資產ê資格。今(tann)是按怎伊會進入臺北市文化資產ê審議，原來是國民黨第六選區ê市議員厲耿桂芳所提案--ê，理由是臭頭仔捌佇只个司令台懸頂講話，有真重要ê歷史意義！

2014年4月初七，以「革命實踐研究院司領臺」登錄做歷史建築。徙過去運動埕ê對面重新閣組立--起來。